Sminkelaget på plass
Korleis skal ein sminke haugafolk og tukthuskarar? Det gav sminkekurset til Leveld Teaterlag svar på.
Skrive av Embrik Luksengard den 16. oktober 2007 klokka 15:16
Helga 13-14. oktober fekk sju nye sminkørar prøve seg med sminkekosten. I samarbeid med Hallingdal Teaterverkstad arrangerte teaterlaget sminkekurs på Leveldtun. Alexander Wallinga frå Pplan AS gav råd og tips før deltakarane kastar seg ut i Haugarock.
- Det har vore veldig interessant og lærerikt. Faktisk veldig gøy – også teorien, seier Torunn Stranden. Ho har vore med på litt sminke før i skuleregi, og no er ho klar for sminkejobb i Haugarock.
- Det blir veldig spenndande!
Øvde på aktørar
Fyrste kursdagen fekk deltakarane grunnleggande innføring i teatersminke. Etter kvart fekk dei prøve seg på skodespelarane i Haugarock som øvde på Leveldtun samtidig.
Det er ein stor sminkejobb som ventar når haugarocken blir sett opp i Ål kulturhus. Den aller største utfordinga er antal aktørar.
- I tillegg er det haugafolk og ikkje berre vanlege nordbygdingar!
Karakterar
Teatersminke handlar ikkje berre om teknikk.
- Sminka skal vera med og understreke karakterane i stykket. Derfor er det viktig at dei som sminkar kjenner stykket og karakterane godt, poengterer Alexander Wallinga.
I Haugarock blir det ei sminkegruppe på 7-8 personar. Tre av kursdeltakarane er klare for haugarock-sminking: Heidi Kvalvågnes, Randi Lunden og Torunn Stranden.
